Imos coidar ao noso planeta

Ola cuquiños! Hoxe é un día moi bonito e especial, é o "Día Mundial do Medio Ambiente".

Vós xa sabedes a que chamamos Medio Ambiente, todos os días en clase falamos diso dunha forma ou outra. O Medio Ambiente é onde vivimos e todo o que nos rodea: o aire que respiramos, a terra que pisamos, os bosques e os ríos que percorremos cando imos de paseo, as montañas que "escalamos" nas nosas excursións, o mar e as praias nas que nos bañamos, xogamos e tomamos o sol... En resumo, o Medio Ambiente é o noso planeta a Terra.

No cole explicamos moitas veces o importante que é manter o noso planeta san para que todos podamos vivir nel de maneira saudable, e digo todos, porque non só somos as persoas, tamén son os animais e as plantas.

Nós cos nosos hábitos e costumes podemos facer e contribuír moito a que todo isto sexa unha realidade.

Debemos coidar a nosa cidade, o noso pobo ou a nosa localidade, no noso caso Lubre, coma se fose a nosa casa e a nosa propia habitación; Debemos tirar o lixo nas papeleiras ou contedores correspondentes.

Cando volvamos xogar nos parques, ademais de contribuír a que estean limpos, debemos utilizar con respecto randeeiras, tobogáns, balancíns, ..., co mesmo coidado que temos en casa ou no colexio cos nosos xoguetes. Todo isto xa o sabiamos, pero é bo volver lembralo.

E hai unha palabra máxica en todo este proceso, RECICLAXE.

Sabemos perfectamente o que significa, volver utilizar moitas cousas e obxectos varias veces, así non xeramos tanto lixo e, ademais, aforramos diñeiro aos papás que estes traballan moito para que vós poidades vivir tan ben como facédelo. Podemos reutilizar a roupa dos nosos irmáns ou curmáns maiores, os xoguetes, os libros... Case todas as manualidades que vos propoño pódense facer con cartóns, papeis de envolver, caixas e moitas outras cousas que a maioría das veces tíranse ao lixo, case todo se pode reutilizar, só hai que ter imaxinación e darlle unha segunda oportunidade.

Hoxe non imos facer fichas, como é venres e temos toda a fin de semana por diante, imos facer xoguetes reciclando, aquí póñovos moitas ideas:

En https://www.amarilloverdeyazul.com/aprende-reciclar-jugando/ podedes ver como se fan e despois elixide e facedes as que máis vos gusten.

Terminamos con Peppa e o seu irmanciño George, que coñecen o que é un punto limpo e aprenden a reciclar:

Non vos esquezades que hoxe, venres, viría ao cole a profe Dolores, picade na foto para visitar o seu blogue:

Boa fin de semana! Un bico bolboreta e ata o luns!

Xogando na piscina

Ola peques! Que tal onte coas bicicletas? Algún se deu conta que xa sabe andar en bicicleta e non o sabía? De todos os xeitos, o importante é facer exercicio, movernos e estar en forma.

Dentro duns días empezará o verán, a estación do ano na que pasamos máis tempo fóra de casa, as temperaturas soben e podemos practicar moitos deportes. Comentamos nalgunha sesión que xa estabades a poñer a punto as piscinas no xardín, que tal vai a cousa, bañástesvos moito? Estes días pasados fixo moito calor e aquí en Galicia hai que aproveitalo para ir á praia ou á piscina, este ano co "pelma" do coronavirus o da praia témolo un pouco complicado, pero a piscina de casa é toda nosa, non temos límites, e agora xa podemos convidar aos curmáns ou aos amigos pero sen pasarse!

Na piscina, ademais de xogar, podemos practicar un deporte estupendo, a natación; Todos temos que aprender a nadar, a maioría xa o estades facendo, porque ides a clase de natación ás piscinas municipais durante o curso, e na piscina de casa só temos que practicar. A natación é un deporte completo, movemos todos os membros do noso corpo e á vez sincronizamos a respiración e, unha vez que aprendemos, xa non se nos esquece nunca. Pero como todos os deportes ten o seu risco e temos que practicalo con sentidiño, tanto dentro da auga como cando estamos fóra e volvémonos a meter. Temos que procurar non molestar ao resto das persoas que se atopan preto de nós.

Agora, despois de pasalo tan ben na piscina, imos traballar un pouco.

Para Selene, Blanca, Elia e Lis:

Para Jimena, Jaime e Borja:

Para Darío:

E esta ficha é para todos, imos a chapotear na piscina, pero tes que debuxar aos teus amigos e a ti dentro dela.

E que vos parece se despois de bañarvos e merendar tentades facer estas manualidades que vos poden quedar moi bonitas e podédesvos divertir moito con elas.

Para acabar, imos rirnos un pouco con Peppa na piscina:

Como todos os xoves toca clase de Educación Física, así que pasade polo blogue do profe Ricardo (http://edufisicra.blogspot.com/) que seguro que ten unas actividades moi chulas para vos!

Un bico bolboreta e ata mañá!

Imos de excursión en bicicleta

Ola peques! Estamos en forma despois da sesión de onte? Espero que si, porque hoxe espéranos moita marcha. E por que digo isto? Porque hoxe celébrase o "Día Mundial da Bicicleta". No cole temos dúas bicicletas especiais, e son especiais porque non teñen pedais, isto fai que cando xogamos con elas, e facémolo moi a miúdo, teñamos que manter un bo equilibrio e se conseguimos facelo, andar nas bicis normais témolo chupado; Seguramente xa sabemos andar nas bicis de pedais (sen "ruedines") e non o sabemos.

Na casa a maioría temos bicis, verdade? Se non é nosa, será dos nosos irmáns maiores ou dalgún curmán ou dalgún amigo, e hoxe ímoslle a dar moita cana para celebrar este día tan divertido.

Ademais, sabemos, porque xa o falamos en clase, que a bicicleta é un medio de transporte respectuoso co medio ambiente, non contamina; Acordádesvos cando coñecemos a cidade de Ámsterdam en Holanda, que ademais de chamala a "Venecia do norte" porque tiña moitas rúas que eran canles , coñecémola tamén pola "cidade das bicicletas"? Por iso é unha cidade moi limpa e bonita; Queda anotado na nosa axenda que, cando o ditoso coronavirus déixenos viaxar, visitarémola.

Pero o deporte de montar en bicicleta, que se chama ciclismo, pode resultar perigoso polas ocasionais caídas que podamos ter, por iso é moi importante poñernos cascos e xeonlleiras e, ademais, cumprir con todas as normas de circulación: non ir por estradas que non teñan sinalado do "carril bici", non ir polas beirarrúas que son para os peóns, no parque andar polos tramos sinalados para as bicis, ...

Mirade que ben resume todo isto o vídeo de Teo:

E agora seguro que temos ganas de traballar con fichas de bicicletas, imos ao choio!

Para Blanca, Elia, Selene e Lis:

Para Borja, Jaime e Jimena:

Para Darío:

E despois de tanta ficha de bicicletas, seguro que pensades que debuxar unha bicicleta é difícil, pois vos equivocades, é super fácil, mirade este vídeo e darédesme a razón.

Que tal vos quedou a vosa bici? Pois amigos, aínda non terminamos, agora tedes que debuxarvos a vós pedaleando nela. Veña, ánimo, que vos quedará de recordo para toda a vida.

Terminamos ríndonos un pouco con Peppa Pig, que tamén lle encanta montar en bicicleta!

Hoxe mércores que non se vos esqueza visitar os blogues das profes:

Dolores

e Cova

Un bico bolboreta e ata mañá!

Hábitos saudables que non debemos esquecer

Ola nenos! Que tal as comidas de onte, despois da "master class" que tivemos sobre o importante que era comer san e variado? Se algún se anima, como facemos en clase, que nos diga cal é o seu alimento preferido, pero que estea dentro deste grupo, ou cal é a receita preferida que lle fan en casa con algún destes alimentos, veña, animarvos, que quizais en Lubre temos un chef con moitas "estrelas michelín" e non o sabiamos.

E se é importante ter unha alimentación sa, isto non é suficiente se ao mesmo tempo non mantemos unha vida saudable; E que significa ter unha vida saudable?: Manter unha boa hixiene e facer exercicio. O primeiro co pesado do coronavirus témolo moi actualizado: bañarnos ou, mellor, ducharnos todos os días (isto último é mellor porque temos que procurar non gastar moita auga, usar só a necesaria, a auga é un ben escaso), lavarnos frecuentemente as mans, en especial antes de comer, limparnos os dentes despois de cada comida, e se comemos chuches, nalgunha ocasión, ao terminar lavar a boca... Unha vez que estamos limpos e relucentes como os "chorros do ouro", chegou o momento de facer exercicio. Vós isto tédelo chupado, primeiro porque sodes moi inquietos e sempre vos estades movendo, segundo porque xogades moito, e terceiro porque Ricardo, o voso profe de Educación Físca, en clase sempre vos propón unhas actividades chulísimas que vos encantan, verdade? Vedes que sinxelo é ter unha vida sa e alegre?

E para lembrar todos estes hábitos, aquí temos unha canción con moita marcha:

E despois de escoitar e bailar con este vídeo, seguro que estades como motos e cunhas ganas tolas de traballar.

Para Elia, Blanca, Lis e Selene:

Para Jaime, Borja e Jimena:

Para Darío:

Para que non se vos esqueza todo o que aprendemos, aquí temos os consellos de Peppa Pig:

Verdade que quedaría moi bonito se nolo imprimisen e pegasen sobre unha cartolina e colocásemolo na nosa habitación? Veña papis, ao choio!

Terminamos con Teo e os seus irmáns divertíndose moito á hora do baño:

Lembrade que hoxe nos toca clase co profe Ricardo, así que visitar o seu blogue que seguro que vos preparou unhas actividades moi divertidas:

Un bico e ata mañá!

Comer san é moi divertido

Ola peques! Como empezamos a semana, con ganas? Ademais, tamén empezamos mes, o mes de xuño, o mes das vacacións de verán, as vacacións máis longas do curso.

Se este fose un "curso normal" xa estariamos cansos e con moitas ganas de saír, ir á praia, xogar nos xardíns e parques, ... Pero este ano foi distinto, aínda así, nós continuamos coa nosa vida activa e sa, aquí tamén se inclúe o "traballo do cole" e todas as rutinas diarias. E por que falo da vida sa? Porque o sábado sabedes que foi o "Día do zume"? E esta celebración lembroume o importante que é manternos activos e sans, e aquí xoga un papel moi importante nosa alimentación.

Falamos moito do importante que é unha alimentación sa e equilibrada; Debemos comer de todo, en especial alimentos naturais; Vós tédelo fácil, porque moitos podedes comer verduras e froitas dos vosos hortos familiares, xa falamos diso en varias sesións anteriores.

Para lembrar o importante que é alimentarse ben, imos repasar a "Pirámide dos alimentos", que xa vimos en varias ocasións en clase:

Que vos pareceu o vídeo? Verdade que é moi fácil alimentarse de forma sa e equilibrada tendo tantos produtos dispoñibles para alimentarnos? Debemos comer de todo e non dicir "non me gusta" se antes non o probamos. Temos moita sorte de vivir onde vivimos e ter o que temos, hai moitos nenos no planeta Terra que non gozan do para nó que é normal, pero isto xa o trataremos noutra ocasión.

Agora imos entreternos un pouco con estas fichas que dan ganas de comerllas.

Para Selene, Blanca, Elia e Lis:

Para Borja, Jaime e Jimena:

Para Darío:

Queredes divertirvos esta tarde? Pois coller plastilina e facer froitas e verduras para convidar os vosos amigos a unha comida saudable e divertida. Póñovos algunhas ideas:

Blanca, ti xa tes onde recibir, a casiña que o avó vos fixo a Carla e a ti.

Terminamos cun vídeo de Peppa Pig que tamén se apunta á comida sa e come de todo con moitas froitas e verduras do horto do avó:

E como hoxe é luns, temos clase de biblioteca, de música e de inglés, non vos olvidedes e visitar os blogues 

da profe Eva http://bibliotecadelcra.blogspot.com/

da profe María http://sondocra.blogspot.com/2020/05/canguros-que-saltan-moi-seguros.html 

e da profe Cova 

Un bico bolboreta e ata mañá!